„მივესალმები РРР პროექტებს ჯანდაცვის სფეროში, რომელიც  სახელმწიფოსა და კერძო სექტორის პარტნიორობას ითვალისწინებს და მიმაჩნია, რომ საქართველო ერთ-ერთი ყველაზე კეთილსაიმედო ქვეყანაა თანამშრომლობის ასეთი ფორმებისა და მიმართულების  განვითარებისთვის“, –  ამის შესახებ ბერნარ კუშნერმა  საქართველოში ვიზიტის შეჯამებისას განაცხადა.

შეგახსენებთ, საფრანგეთის ყოფილმა საგარეო საქმეთა მინისტრმა ბერნარ კუშნერმა საქართველოს ოფიციალურ პირებთან  შეხვედრები „გლობალური ალიანსის” სამეთვალყურეო საბჭოს თავმჯდომარის სტატუსით  გამართა. კუშნერის ვიზიტის  ძირითად მიზანს საქართველოს ჯანდაცვის სფეროში მიმდინარე რეფორმები და განხორციელებული წარმატებული პროექტების გაცნობა და შეფასება წარმოადგენდა. „გლობალური ალიანსის“ სამეთვალყურეო საბჭოს თავმჯდომარემ საერთაშორისო კონფერენციაში: „ჯანდაცვის გამოწვევები 21-ე საუკუნეში – საქართველო და მსოფლიო” მიიღო მონაწილეობა. კონფერენციას მთავრობის წარმომადგენლები და უცხოელი სტუმრებიც ესწრებოდნენ.

კუშნერის თქმით, საქართველო დღესდღეობით, ნამდვილად იმსახურებს მაღალ შეფასებას ჯანდაცვის სისტემის მოდერნიზაციაში მისი მისწრაფებების, ტემპების თვალსაზრისითა და გათვალისწინებით.

„დარწმუნებული ვარ, რომ კიდევ რამდენიმე წელი გავა და ამ ქვეყანაში ჩემი მორიგი სტუმრობისას უფრო მეტ სიახლეს შევიტყობ საქართველოს ჯანდაცვის სფეროს მიღწევების შესახებ. ვიზიტის განმავლობაში უამრავი შეხვედრა მქონდა, ვესაუბრე ჯანდაცვის მინისტრს, მის კოლეგებს, ექიმებს და სტუდენტებსაც კი. ამ შეხვედრების შედეგად გამიჩნდა სურვილი, რომ უფრო მეტად დავეხმარო საქართველოს. მზად ვარ ყველას გავუზიარო გამოცდილება, რომელიც ჯანდაცვის სისტემაში მრავალი წლის განმავლობაში მუშაობის შედეგად დამიგროვდა, კერძოდ კი, საფრანგეთის ჯანდაცვის მინისტრის პოსტზე მუშაობისას, რადგან ამ ქვეყანაში მე დავინახე ხელსაყრელი ნიადაგი, რომელშიც ნამდვილად შესაძლებელი იქნება ნაყოფის მიღება ,,გლობალ ალიანსისა” და მთავრობის ერთობლივი მუშაობის შედეგად“, – განაცხადა მან.

ბერნარ კუშნერმა ასევე კომენტარი გააკეთა თბილისში სამი საავადმყოფოს რეკონსტრუქციის პროექტზე, რომელიც განხორციელებული იქნება სახელმწიფო კერძო პარტნიორობის ფარგლებში. „ევროპაში ჯანდაცვა სახელმწიფოსა და ბიზნესს შორის РРP მოდელის ფარგლებში თანამშრომლობის დარგობრივი პრიორიტეტების ლიდერების სამეულში შედის. მე ურთიერთქმედების ასეთი ფორმის მომხრე ვარ ერთი მარტივი მიზეზის გამო: ის საშუალებას იძლევა, რომ სახელმწიფოს მხრიდან ნაკლები ფინანსური დანახარჯებით მიღწეული იქნას ჯანდაცვის სფეროში პროექტების განხორციელება საერთო ეროვნულ დონეზე. და ეს ყველაფერი შესაძლებელია გონივრულ ვადებში, და ამასაც არა ნაკლები მნიშვნელობა აქვს. რამდენადაც ჩემთვის ცნობილია, თბილისში იგეგმება ეროვნული დონის 3 საავადმყოფოს რეკონსტრუქცია. РРР ამ სიტუაციაში პოლიკლინიკების რეკონსტრუქციის ხარისხის მაღალი სტანდარტების, თანამედროვე დიაგნოსტიკური აპარატურის დაყენების, პერსონალის სწავლების, ახალი თანამედროვე ლაბორატორიების შექმნის გარანტიას იძლევა. მთავარია, რომ ამ ყველაფრის შედეგად, ადამიანებს საშუალება ექნებათ მიიღონ ევროპულ სტანდარტებთან მიახლოებული სამედიცინო დახმარება, საკუთარ ქვეყანაში. სწორედ ამიტომ მივესალმები РРР პროექტებს ჯანდაცვის სფეროში და მიმაჩნია, რომ საქართველო ერთერთი ყველაზე კეთილსაიმედო ქვეყანაა თანამშრომლობის ასეთი ფორმის განვითარებისთვის“, – თქვა მან. ბერნარ კუშნერმა ასევე აღნიშნა, რომ უახლოეს მომავალში საქართველოში დაბრუნებას გეგმავს, კერძოდ, ჯანდაცვის სფეროში რეფორმების პაკეტზე „გლობალური ალიანსის“  მუშაობის ფარგლებში.